علي بابا تدمج ذكاء كوين في سيارات بي واي دي وفولكس فاجن وصناع محليين

أعلنت مجموعة علي بابا الصينية دمج نموذج الذكاء الاصطناعي كوين (Qwen) في أنظمة سيارات بي واي دي وفولكس فاجن وجيلي وشيري وسلسلة من العلامات التجارية داخل الصين. الخطوة دي جت بالتزامن مع معرض بكين للسيارات عشان تخلي العربيات أكثر ذكاءً باستخدام قدرات المعالجة اللي بتوفرها قطع الهاردوير في المركبات نفسها.

السائقين هيقدروا يطلبوا أكل أو يحجزوا فنادق وتذاكر طيران أو يتابعوا شحناتهم بأوامر صوتية بس. التقارير اللي نقلتها سي إن بي سي عن علي بابا بتقول إن النظام بيجمع بين المعالجة المحلية والحوسبة السحابية عشان يترجم الكلام ويربطه بخدمات الدفع والملاحة حتى لو الاتصال بالنت ضعيف.

التكنولوجيا دي بتعتمد أساساً على رقائق شركة إنفيديا (NVIDIA) اللي بي واي دي وجيلي وغيرهم متعاقدين عليها من فترة. السيارات دي شغالة بمعالجات ثور وأورين المتطورة.

السوق الصيني للسيارات الكهربائية غرقان ومنافسة السعر مابقتش كفاية. الشركات هناك بتدور على أي ميزة في السوفت وير عشان تبيع وتتميز. كاديلاك وأودي كمان مش بعيد عن المشهد ولجأوا لذكاء دوباو التابع لشركة بايت دانس في موديلاتهم الجديدة لنفس السبب.

نموذج كوين أومني وكوين في إل دخلوا الكابينة الذكية لسيارات بي واي دي. الأومني بيخلي السيارة تفهم النص والصور والفيديو والصوت في نفس الوقت والـ في إل بيحلل اللي بيشوفه في الطريق لحظة بلحظة.

الموضوع مش جديد تماماً.. علي بابا أعلنت من سنة دمج نموذج تونغ يي في سيارات بي واي دي بس المرة دي الميزات أوسع وشاملة توليد خلفيات شاشة وقمرة قيادة تفاعلية مخصصة. الماركة الفاخرة دينزا وماركة هونغ تشي التابعة لمجموعة فاو طبقوا النظام ده فعلاً في موديلات هجينة نزلت السنة دي. لكن لسه مفيش معلومة أكيدة لو ميزات الذكاء الاصطناعي دي هتوصل للنسخ اللي بتتباع بره الصين ولا هتفضل بضاعة محلية.