12 مليون دولار.. أحمد عز يكشف تكلفة وإيرادات ولاد رزق
تحدث النجم أحمد عز، خلال ندوته المقامه حاليا ضمن فعاليات مهرجان القاهرة السينمائى فى دورته الـ 45، عن فيلم ولاد رزق القاضية وتصويره بالسعودية ودعمه وتمويله من هيئة الترفية.
وقال أحمد عز، خلال الندوة التي يديرها الناقد رامى المتولي: “فيلم كيرة والجن حقق 130مليون جنية الفيلم عندنا بيكلف من 4 لـ 5 مليون دولار، هيئة الترفية قالت لي تعالى هنكلف الفيلم 12 مليون دولار والفيلم حقق 25 مليون دولار فى العالم حد هيفدنى أقوله لا”.
وأضاف “عز”: “كنا بنعمل أفلام بدعم من روتانا وart والسعودية ومصر والإمارات وكل بلاد العرب أوطان وفاكرعبد الحليم حافظ فى لقاء قال تحية العروبة كلنا واحد”.
وتابع أحمد عز: “وأنا بصور فى السعودية كأنى بصورفى مصر وأى حد يفيدنى فى مسيرتى أشيله من على الأرض وربنا يديم المحبة لأن إحنا واحد وكل التحية لهيئة الترفية والمستشار تركى آل الشيخ”.
أحمد عز يهدي تكريمه للزعيم عادل إمام
حصد الفنان أحمد عز جائزة فاتن حمامة ضمن فعاليات مهرجان القاهرة السينمائي في دورته الـ45.
عزّ عبر عن سعادته الكبيرة بهذا التكريم و أهدى الجائزة التي حصل عليها للزعيم عادل إمام وأكد أنه فخور بالتكريم على خشبة مسرح دار الأوبرا بعدما اختار دخول مجال الفن منذ 24 عامًا دون رغبة أهله
وتابع أحمد عز: “وتلف الأيام، وأقف على خشبة دار الأوبرا العريقة واتكرم بجائزة اسم صاحبتها وحده جائزة ويمنحني الجائزة معالي وزير الثقافة والنجم الاستاذ نجم النجوم اللي مجاش زيه، بس للأسف كل دا بيجي وأبويا وأمي مش موجودين، وأكيد لو كانوا موجودين كانوا هايبقوا فخوريين بيا”
أحمد عز يتحدث عن موقف قديم في المهرجان
وتابع أحمد عز حديثه: “روحت المهرجان أول مرة عشان أتصور ومحدش عرفني وعديت على الكاميرات ومحدش بصلي وقولت مش مشكلة، وكان نفسي أقعد عشان أبويا وأمي يشوفوني في البيت عشان يبقوا فخوريين بيا، وبتاع الأمن وأنا داخل قالي حضرتك قاعد فوق خالص، وفعلًا قعدت فوق وروحت البيت وأنا متضايق جداً وأمي يوميها قالتلي ربنا ينولك مرادك”
أحمد عز: بحس لحد النهاردة إني لسه معملتش أي حاجة
و ختم عز كلمته ” الجائزة دي مش بتاعتي لوحدي دي بتاعة كل واحد علمني حاجة وأنا أعتبر الجائزة العظيمة هي حافز للي جاي وأنا بحس لحد النهاردة إني لسه معملتش أي حاجة وأنا فاكر أول مرة كنت قاعد مع ساندرا نشأت وهي بتقولي هنقدمك للناس إزاي، ويا رب كل زملائي وكل أصحابي يقفوا مكاني ويتكرموا تكريمات أحسن مني بكتير، وأهدي الجائزة للزعيم عادل إمام».
