ملك زاهر تطمئن جمهورها على حالتها الصحية بعد وعكة مفاجئة

كتب: أحمد مصطفى

خرجت الفنانة الشابة ملك زاهر من المستشفى بعد وعكة صحية مفاجئة، لتطمئن جمهورها ومحبيها على حالتها عبر حسابها الرسمي على إنستجرام.

ملك زاهر تكشف تفاصيل حالتها الصحية

كشفت ملك زاهر عن تفاصيل ما مرت به، قائلة: “والله ما كنت متوقعة كل اللي حاصل ده، لما حبيت أشارك حالتي الصحية، كنت مخضوضة جدًا على نفسي. فكرة إن لا أنا ولا الدكاترة عارفين عندي إيه، كانت رعباني”. وأضافت: “كنت محتاجة أوصلكم إن حياتي فيها الحلو وفيها الوحش، وقلت في الاستوري إن الموضوع مش الغرض منه القلق، وإني مش عايزة حد يقلق عليا، أنا كويسة، وكده كده أحسن من غيري”.

ملك زاهر تشكر كل من سأل عنها

أعربت ملك زاهر عن امتنانها لكل من سأل عنها ودعا لها، قائلة: “عندي يقين في ربنا أنه هيقومني بالسلامة، وإن شاء الله تبقى حاجة بسيطة. بس من خضتي كتبت مع أن دي مش طبيعتي إني أشارك الحاجات السلبية. عمومًا أنا بس مش عارفة أقول إيه من قلبي”. وتابعت: “بشكر كل حد سأل عليا ودعالي واللهِ كله كان بيوصلني، وأنا أسفة لو مردتش على حد. وبشكر كل زمايلي وأساتذتي اللي كانوا بيسألوا عليا كل يوم ومسابونيش لحظة، وكل صحابي وعيلتي اللي كانوا جمبي”.

حساسية شديدة في الدم وراء الوعكة الصحية

وأوضحت ملك زاهر طبيعة مرضها قائلة: “أنا الحمد لله بقيت أحسن من الأول وبطلت أروح المستشفى. بحمد ربنا إنها جت على قد كده حتى لو الأيام اللي فاتت كانت صعبة. واللي عندي ده حاجة مخيفة شوية وخضتنا، بس برضه أنا كويسة والحمد لله إنها جت على قد كده، أكيد ربنا حماني من حاجة أكبر”. وأكدت: “أهم حاجة إن عرف السبب بطل العجب، والحمد لله إننا عرفنا، هي حساسية شديدة في الدم، الموضوع critical، بس أنا مطمنة، أنا بخف وبتحسن كل يوم الحمد لله والشكر لله، ومافيش حاجة خطيرة بإذن الله”. واختتمت كلامها قائلة: “أنا أسفة لو كنت قلقتكم، بس ده ماكانش الغرض أبدًا والله. شكرًا من كل قلبي على الحب ده، أنا عرفت غلاوتي عندكم وعند كل اللي حواليا، بشكركم من قلبي”.