تامر عاشور يشيد بـ”صاحبة السعادة”.. ويكشف كواليس زواجه من نانسي نور
كتب: أحمد جمال
أعرب الفنان تامر عاشور عن سعادته البالغة بردود الأفعال الإيجابية على حلقتيه ببرنامج “صاحبة السعادة” مع الإعلامية إسعاد يونس، والتي تصدرت محركات البحث ومنصات التواصل الاجتماعي خلال الساعات الماضية.
تامر عاشور يُشيد ببرنامج “صاحبة السعادة”
وكتب تامر عاشور، عبر حسابه الرسمي على إنستجرام: “مساء الخير على أجمل ناس في الدنيا، وحشتوني جدًا. أولًا، مبسوط جدًا بردود أفعالكم على حلقتيّ برنامج صاحبة السعادة، اللي أنا نفسي وأنا بصوره مكنتش متخيل هيطلع بالجمال ده، خصوصًا مع الفنانة الكبيرة المثقفة المبدعة حبيبة الكل إسعاد يونس”.
وأشاد تامر عاشور بفريق عمل البرنامج، قائلاً: “كل فريق العمل من إخراج وإعداد وهندسة صوت وديكور وإضاءة ومساعدين، كله كوم، وجمال موسيقى تتر البرنامج كوم تاني للمبدع عمرو إسماعيل، اللي بتضيف كتير لصورة الضيف وتاريخه”.
كما وجه الشكر لفرقته الموسيقية، قائلاً: “أحب أشكر إخواتي وأصحابي وعشرة السنين الحلوة فرقتي الموسيقية اللي مفيش زيهم فنًا وحبًا وإخلاصًا، وده باين في اللي بيقدموه”.
قصة زواج تامر عاشور ونانسي نور
وكشف تامر عاشور عن قصة زواجه من نانسي نور، قائلًا: “اتعرفنا على بعض عن طريق صديق، أول ما اتعرفنا على بعض أنا دخلت في الموضوع على طول، أنا زمان كنت بشوف نانسي في التليفزيون ومكنش ليا علاقة بيها تمامًا ولا أعرفها ولا أي حاجة وكنت بقول يارب ليه متجوزش واحدة زي دي، والموضوع اتنسى بالسنين”.
وأضاف: “لما تعرفنا على بعض مرضيتش أحكيلها على الموقف ده، بعد كام شهر لما تعرفنا على بعض اتقدمت لباباها وهو صعب جدًا، باباها قعد معايا ورحب بيا واتكلمنا في حاجات كتير جدًا هو عايز يختبرني واتفقنا على الخطوات اللي هنعملها، إحنا كنا كتب كتاب مش فرح، بس من كتر الناس الموجودة وبنحبها طلع شكله فرح”.
